Tahua

Te Mahi Toi 2020

Mana Moana 2020
Digital Oceans

Mō Mana Moana Digital Ocean, kua huihui mai neke atu i te 20 ngā ringa toi rongonui ko ētahi he Māori, ko ētahi he Tangata Moana mō tēnei kohinga toi rerehiko i te ipurangi – ka whai wāhi ai i runga i te papa wai ahu-toru ā-ipurangi.

Ka whatua ngā toi me ngā matihiko i roto i ēnei mahi toi e waru, he toi ataata, he ataata ao mariko, he hanga mariko ahu-toru hoki. Ka puta ko tēnei whakaaturanga hou – he tuku kōrero ki tō tātou hononga ki te wai, me te mahi i mua i a tātou kia ora tonu ai ngā wai o te ao. 

Ka whai tēnei kaupapa i a Mana Moana 2019, engari, i raro i ngā herenga o te wā o te Mate Korona, kua neke kē ki te ao matihiko.

Ka tuku kōrero ēnei mahi toi mō te manaakitanga, mō te whanaungatanga, ā, he akiaki hoki i a tātou kia pai ai tā tātou tiaki i te ao nei. Nā, e kitea ana ngā kaupapa o te hauora, o te tauritetanga, o te mahu i ēnei mahi toi. Kua pōhiritia e ngā ringa raupī he ringa toi rongorau kia mahi i ngā toi e ū ana ki te kaupapa, engari e toro whānui ana ki ngā āhuatanga hou i roto i taua kaupapa.

I te mea kua neke te kaupapa ki te ao ipurangi, ka whakaarohia e ngā ringa raupī he moana pōuriuri ahu-toru hei papa mō ngā mahi toi hou, ā, ko tēnei wāhi ipurangi he mahi toi tonu, he wāhi hāereere mō te hunga mātakitaki. Kua whakarōpūhia ngā ringa toi he rerekē ngā pūkenga o tētahi ki tētahi, kia mahi tahi ai i roto i tēnei ao matihiko – ka puta he mahi toi motuhake. Ka whakamahia e te paetukutuku nei he hangarau pūtirotiro hou, kia rumakina te hunga mātakitaki i te ao pāhekoheko.

Ka tukuna ngā mahi toi nei ki te ao i te wā o Matariki – he wā o te mahara me te whakahou – ka whakaaturia i tētahi wāhi motuhake hou, he papa toi matihiko. I hiahia ngā kaihoahoa ki te hanga i tētahi wāhi rerekē rawa, ka kuhu te tangata mā te waharoa, ka whakarongo ki te karakia tīmatanga. Mā konei, ka ū tonu te āhua o te kaupapa ki ngā tikanga Māori, he tikanga kua panonihia kia tau ai ki roto i te ao matihiko, pērā i te kaupapa toi nei.

Ka ū ki tōna kaupapa matihiko nei – ka whakarewatia i te hui mā runga ipurangi, me te karakia a ngā ringa toi i te taha moana o Te Whanganui a Tara. Arā hoki tētahi hui topa nā Kaikaunihera Tamatha Paul i whakahaere, ka ruku hohonu ki ngā whakaaro i raro i ngā mahi toi nei, me te moemoeā a ngā ringa raupī.

blank