Copyright Mana Moana Collective / Storybox
Footer link 1 | Footer link 2
Nā Rachael Rakena (Ngāi Tahu, Ngā Puhi, Ngāti Pākehā) i tito te kupu ‘Toi Rerehiko’ hei whakamārama, hei tautohu hoki i āna mahi toi ataata/matihiko/tāhiko e pā ana ki te raupapa, te nekeneke me te mahi tahi. E arohaehae ana i te whakaaro o te tuakiri kōrure, me ngā mātauranga ahurea e pā ana ki te wā me te wai – ka whakaaturia te wāhi matihiko hei wāhi wai, e nohoia e te iwi Māori. Kua tipu āna toi puni ki te whakaahurea, ki te whakatōrangapū i te wai tonu – ka whakatere hoki kei waenga i ngā take o te noho whānui o ngā Tāngata Moana, i ngā waipuke me te tipu whakarunga o te mata o te moana, i te wetewetenga a ngā iwi taketake i ngā tāmitanga / te whakarauora hoki. E whakaatu ana ia i āna mahi i roto i ēnei tau 25 nei, ināianei e mahi ana ia ki Te Whiti o Rehua, Te Kunenga ki Pūrehuroa.
Ko Mike Bridgman (Tonga, Ngāti Pākehā) he ringa toi matihiko i ēnei tau 20 nei, e mahi ana i ngā wāhi maha, i ngā ahumahi mahi pērā i ngā kiriata, i ngā whakaari, i te pouaka whakaata, i ngā tānga, i te ipurangi, i ngā kēmu ataata, i ngā kiriata puoro, i ngā toi puni, i ngā hui ahurei, i ngā whakaaturanga kākahu, i ngā whare taonga, i ngā whakaaturanga wheako, i ngā whakaari pāhekoheko, i ngā mahere whakaata hoki. I Hangahai ia e noho ana mō te tekau tau, ko tāna mahi he hanga i ngā wheako ataata i ngā wāhi maha mō pakihi o te ao whānui. Kua hoki mai ia ki Aotearoa me āna wheako rahi, tau atu ai ki Te Whiti o Rehua, ki Te Kunenga ki Pūrehuroa. He ringa tohu matihiko o te reanga tuatahi, ko Mike tērā e ārahi ana i te puāwaitanga o te mahi hoahoa, mahi toi i te ao matihiko.
I whakatūria i te tau 2010, he pakihi pāpāho, mahi toi hoki. Ko te mahi matua ko te para i ngā huarahi hou kia pai ai te tūhonohono ki te hunga mātakitaki. Whakapono ai mātou ki te mana me te tika o te mahi toi kia pai ai tō tātou ao mō āpōpō.
Kaiārahi auaha / kaiwhakatū o Storybox
Nā Rob a Storybox i whakatū i te tau 2007, ā, mai i taua wā kua tipu kia puāwai ai ko te pakihi o nāianei. Māna e ārahi ngā rautaki me te aronga auaha mō ngā tini kaupapa o Storybox – he mahi hāpai, he toi puni, he kaupapa pāhekoheko, ā, mā Rob tonu e whakaputa ngā pakipūmeka a Storybox.
He rawe ki a Rob te mahi tahi me ngā kiritaki kia whakatinana ai ā rātou kaupapa. Ngākaunui ana ia ki te tuku kōrero, ahakoa he kōrero kiriata, rongorau, hui taurima raiti, he rautaki auaha rānei.
Ko Rob tērā e ārahi ana i ngā kaupapa mō ngā kiritaki tokomaha (pērā i Te Papa, Wellington Water, NZ Sevens, STA Travel, Te Manatū Taonga, Waka Kotahi, me UNICEF) me ngā hui taurima mahi toi (pērā i te NZ Festival Of the Arts, Sydney Vivid, Glow Eindhoven, Lumina Portugal, China Shanghai International Arts Festival, LUX Wellington).
Kaiwhakahaere hinonga o Storybox
Kua kawea mai e Andrew ki Storybox ōna pūkenga mō te mahi whakahaere hinonga, mō te manaaki kiritaki, me ōna kanohi hōmiromiro. Māna e whakahaere ngā whakaaturanga toi, ngā toi puni, me ngā kaupapa whakaohooho tūmatawhānui ki Aotearoa, ki tāwāhi hoki.
Kua mahi a Andrew i ngā horopaki maha, pērā i te whakahaere ringa toi, i te whakahaere hinonga, i te whakahaere whakaaturanga puoro, i te whakahaere hui, i te whakaputa mahi toi anō hoki. I tīmata āna mahi hei kaiwhakahaere i ngā pēne me ngā kaiwhakaari i Poihākena, kātahi ka neke ki Rānana, i reira ia i tū ai hei kaiwhakahaere konohete mō Nigel Kennedy mō te tekau tau. Ka mahi ia i te taha o Roger Waters i a ia e tāpoi haere ana mō The Flesh World, ā, i te taha hoki o ngā tāngata rongonui pērā i a Nina Simone me The Who – e tautoko ana i ngā mahi rekoata me ngā whakaaturanga ā-tinana hoki.
Copyright Mana Moana Collective / Storybox
Footer link 1 | Footer link 2